حكاية علي

بدأت الرحلة من قبرص وصلت مطار صوفيا الساعة 11

الظهر معي فيزتي وحجوزات الفنادق وتذكرة العودة وخطة الرحلة والتأمين الصحي وبتوقع هيك كافيين كمستندات عند الدخول لتبين الغرض من الرحلة!

استنيت ع الدور عشان أختم الجواز وابدأ برحلتي وصلت عند الشرطي شاف الجواز وبعد ثواني ترك مكانه وحكالي استنى شوي، غاب 5 دقايق ورجع بيحكيلي روح عند زميلي بدو يسألك كم سؤال حكيتله ماشي... 

تركت الدور ورحت على جنب لقيته حامل جوازي وبيسألني عن ختم السفارة الايطالية لما قدمت على فيزة وانرفضت حكيتله انه هاي من السنة الماضية واني قدمت على فيزة وما طلعت بس هسى معي فيزة لبلغاريا ومعي الاوراق كلها اللي لازم تكون معي... جاوبني أنه بلغاريا شنجن واذا انت مرفوض من ايطاليا معناها انت مش لازم تدخل وانه فيزة بلغاريا ما بتكفي عشان أسمحلك تدخل بعد نقاش طويل حكالي استنى شوي وراح... إلا بيبعتلي شرطي ثاني يقعد عندي بلشنا حكي وطولنا وصرنا صحاب وبعد ما سألني كثير أسئلة حكالي انه انت لازم ترجع يا على قبرص أو على الأردن أو على تركيا ولو تشجر للسما ما بتدخل بلغاريا... شوووووو مال اهلك؟ ليش؟ شو في؟ مش فاهم اشي واللي رفضني مش قابل يصلي ع النبي ويحكي معي!! 

شبكت نت من المطار ودخلت أدور على السفارة الأردنية ببلغاريا ما لقيت إلنا سفارة، بعتت ايميل لدائرة الهجرة بلكي أوصل لحد يساعدني ما لقيت  بعدها راح الشرطي اللي معي وجاب ورقة الرفض وقعني عليها وكانت لسبب انه ما معي مستندات تبين الغرض من رحلتي مع انه معي! وجاب  جدول الرحلات وحكالي انه في رحلتين على تركيا اليوم ولازم تحجز على وحده منهم رجعت حاولت معه بلكي الله يهديهم ويتركوني أدخل ع الفاضي.

حكيت خلص خليني أحجز ع اسطنبول واكمل رحلتي هناك بلاش يضيع علي الوقت وما استفيد اشي. الساعة 1 حجزت رحلة الساعة 10 ع اسطنبول وع اساس اني أضل بالمطار مكان ما كنت.. بعد ما حجزت وتأكد انه في تذكرة باسمي أخدني ع مكان فيه 4 غرف وحمام وطلع وسكر الباب وينك يا معلم؟ وين رايح؟ طلع سجن المطار!!! 

طبعاً محسوبكم كان مش نايم من قبل بيوم وتعبان ومع سمّت البدن إللي أكلتها حكيت وينك يا تخت ودخلت ونمت، أجاني صاحبي الشرطي وصحاني الساعة 8 المسى بيحكيلي"You were sleeping like a dead man" حكيتله تسلم الله يخليك إلا بيحكيلي يلا بدنا نروح باي ونزلنا تحت وأخدني على مبنى ثاني وصلنا ولقيت يمكن 6 او 7 زي حالتي اللي تركي اللي روسي اللي صيني اللي سوري طلعت مش لحالي اللي هيك قلت معقووول هدول كلهم مقدمين على فيزا لإيطاليا وما أخذوها!! لأ يا حبيبي هدول بيرفضوا الناس عن جنب وطرف، طيب إذا ما بدكم تخلونا ندخل ليش بتعطونا فيزا؟!!!!! لهسى ما عرفت ليش؟

وقفت مع الشب السوري وحكينا شوي وحكالي انه هو حاجز تذاكر جديدة ذهاب واياب من اسطنبول لفارنا وانه احجز معي وهيك بنقوي موقفنا مع بعض. حكيتله لأ ما إلي مصلحه أخسر كمان 250 يورو كمان ومش أكيد أدخل بس خد رقمي واذا زبطت معك احكيلي وبعدها طلعنا ع الطيارة ووصلت اسطنبول وانا ما عندي حجز فندق نزلت بالسلطان أحمد ودورت على هوستل ولقيت بعد ساعة هوستل حجزت ليلة وباليوم الثاني طلعت وحجزت بمكان أحسن منه لكمان ليلة وطلعت قابلت ناس من الكاوتشسيرفينج وضليت معهم للساعة 1 بالليل وانا مروح بالليل بعتلي الشب السوري لوكيشن من جوى بلغاريا! هلا معلم كيفك؟ كييييييف عملتها؟ حكالي لغيت التذاكر ورجعت ع اسطنبول وطلعت بالبر وحطيت بالجواز 50 دولار أخدوني على مبنى الضابط وبهدلوني وهما بيضحوا وختمولي الجواز ودخلت واذا بدك تدخل اعمل نفس الاشي.

والله ما صدقت ثاني يوم رحت وحجزت باص من اسطنبول لصوفيا وطلعت وحطيت 50 يورو بكفر التليفون عشان اسحبها واعطيه اياها بس لما صرت بالموقف كثير خفت وترددت وما طلعتها وأخدت كمان رفض من الحدود البرية لسبب اني ما معي وسائل مالية تغطي فترة وجودي ببلغاريا مع إني حكيتله انه معي 400 يورو كاش ومعي بطاقات فيزا بس خلص بدو يرفض وهون زاد عنادي أكثر إني أدخل  رجعت ع تركيا مشي  وختمت الجواز ودخلت أستنى سيارة أنزل معها ع اسطنبول إلا ربنا ببعتلي واحد تركي بيحكي عربي دبرني بباص مع واحد بيعرفه لاسطنبول وحكالي أنه اذا ما رشيت بعمرك ما بتدخل وانه اذا بدك ارجع بكرى مع السايق نفسه وهو بدخلك وطلعت بالباص راجع ونزل الزلمة التركي اللي بحكي عربي ع الطريق وانا كملت حاولت افهم من السايق وين بدي ألاقيه باسطنبول ثاني يوم بس ما فهمت إلا اوتوجار طيب يا عمي ما هي أوتوجاو كبيرة وين بالزبط ما فهمت اشي!

كان عندي حجز احتياطي لنفس الليلة باسطنبول رجعت ونمت وصحيت ثاني يوم وطلعت على أوتوجار ودورت شوي حكيت بلكي شفت الزلمة ما لقيته حكيت بحجز لحالي وهالمرة بغامر وبحط الفلوس بالجواز واللي يصير يصير...

وصلنا الحدود ونزلت قبل الكل واستنيت لما الشرطي ما كان عنده حد ودخلت عليه أعطيته الجواز وشاف أختام الرفض وال50 يورو  سألني ليش هاي الأختام حكيتله ما كان معي فلوس وهسى حليت المشكلة ومعي 3 بطاقات فيزا  حكالي طيب استنى شوي ورن تليفون على واحد مبين انه أعلى منه اللي فهمته انه اللي ع التليفون حكاله اقرأ الاسماء اللي ع البطاقات إلو ولا لأ قرأهم وحكاله إلو وبعدين صار يضحك (انبسط أخد ال50 يورو لحاله) وختملي الجواز وانتهت المعاناة ووصلت وجهتي وأخيراً.