صاحب العزيمه القويه

هاد الرجل أبوي (أبو محمد) بيوم من الأيام إجت بنته اللي ساكنه ببلد بعيدة عنه تزوره....أصر تاني يوم أنه ما يخليها ترجع خاف عليها ليصير معها مكروه ...فقرر انه يوصلها ويكسب الصلاة في الأقصى(القدس) بيوم من أيام رمضان...وبالفعل اتسهلنا وكل شي كان على أحسن وجه... واحنا ماشيين فجأة بثواني معدودة بشوف ابوي عم بضغط على حاله وعم يشد على المقود بقوة ...انا فكرت 

انه تعب بس هو كان عارف انه في اشي بالسيارة مش صح...  وانه عم بفقد السيطرة عليها فحاول يتجنب السيارات بالاتجاه الثاني... فكان أنسب حل أنه ياخد يمينه وعلى يمينه كان خندق قلبت السيارة فيه...طلعوني من السيارة وانا بنص الشارع غبت عقليا عن الوعي لما شفت ابوي مش عم بتحرك ومجمد محله... بطلت اشوف الناس المتجمعة علينا  بطلت قادرة اتنفس ليه مش عم بتحرك ليه جامد كل السواد اللي بالدنيا شفته لحظتها...(أبوي أحسن أب بالدنيا) كانت الاصابة تبعته قوية أسفل الرأس واثر على قدرته الحركية  لدرجة ضل أكثر من 6 شهور بالمستشفى ما بقدر يتحرك ومن عملية لعملية...والحمدلله مع الوقت الشاب اللي كان ما يخلي محل يسافر عليه اتحسن شوي...  قعد فترة كبيرة بالبيت لدرجة انه ما بده اي اشي من الدنيا ولا يروح عمحل وما يطلع نهائيا...بيوم من الأيام قررنا انا وبنت عمي نسفره غصبا عنه... وبالفعل اتصلناله بيوم وقلناله حجزنالك كل شي والسفرة باليوم كذا وكذا طبعا مانع لأنه حركته صعبه وبخاف يصير اي اشي وانه احنا صعب علينا رعايته...مع هيك سفرنا كانت أجمل سفرية بالدنيا عصفور مسجون بالقفص وفجأة انفتح القفص وطار وحلق ...الروح الحلوة تبعته ملت المكان كل الأماكن كانت غير الارض السما الشجر الناس كله يضحكله....فالحمدلله على ما كان والحمدلله على ما سيكون والحمدلله الذي يجبر خواطرنا...